5 fevralda Dini Qurumlarla İş üzrə Dövlət Komitəsinin sədri Ramin Məmmədov Sumqayıtda fəaliyyət göstərən dini ibadətgahları, o cümlədən Sumqayıt Yəhudi Dini İcmasının ibadət evini ziyarət edib və icma rəhbərliyi ilə görüş keçirib.
Görüşdə Azərbaycanda dini tolerantlıq və multikulturalizm ənənələrinin dövlət siyasətinin prioritet istiqamətlərindən biri kimi dəstəkləndiyi vurğulanıb. İcmanın ravvini Leichter Menachem Mendel yəhudi dini ayinlərinin sərbəst şəkildə həyata keçirilməsi üçün yaradılmış şəraitdən danışıb.
İcmanın rəhbəri Brenneysen Yevgeniy Anatolyeviç icmanın fəaliyyəti və həyata keçirilən dini-ictimai təşəbbüslər barədə məlumat verib. İdarə heyətinin üzvü Ştofenmaxer Mixail Borisoviç və icma üzvü Emin Əliyev də çıxış edərək fikir və təkliflərini bölüşüblər.
Görüşdə qarşılıqlı hörmət, etimad və dini müxtəlifliyin qorunmasının əhəmiyyəti xüsusi vurğulanıb.
